Ֆրանսիայի Իլ-դը-Ֆրանս ռեգիոնի խորհրդի բանաձևը՝ ՀՀ ինքնիշխան տարածքի նկատմամբ ադրբեջանական ագրեսիայի դատապարտման և Հայաստանի տարածքից ադրբեջանական զինված ուժերի դուրսբերման պահանջի վերաբերյալ

09 նոյեմբերի, 2022

Նոյեմբերի 9-ին Ֆրանսիայի Իլ-դը-Ֆրանս ռեգիոնի խորհուրդը՝ Վալերի Պեկրեսի նախագահությամբ, միաձայն ընդունել է բանաձև, որով վերահաստատում է իր աջակցությունը հայ ժողովրդին, դատապարտում է ՀՀ ինքնիշխան տարածքի նկատմամբ տեղի ունեցած ագրեսիան և պահանջում է ադրբեջանական զինված ուժերի դուրսբերում Հայաստանի տարածքից։ Ի թիվս այլ դրույթների՝ Ֆրանսիայի Իլ-դը-Ֆրանս ռեգիոնի խորհրդի բանաձևը.

- Ֆրանսիայի Իլ-դը-Ֆրանս ռեգիոնի խորհուրդը վերահաստատում է իր աջակցությունը հայ ժողովրդին և խստորեն դատապարտում 2022թ. սեպտեմբերի 13-ին և 14-ին ադրբեջանական զինված ուժերի կողմից Հայաստանի Հանրապետության հարավային և հարավ-արևելյան շրջանների նկատմամբ տեղի ունեցած ագրեսիան:

- Պահանջում է ադրբեջանական զինված ուժերի անհապաղ և անվերպահ դուրսբերում Հայաստանի ինքնիշխան տարածքից՝ համաձայն 2020թ. նոյեմբերի 9-ին կնքված Հայաստանի և Ադրբեջանի միջև զինադադարի համաձայնագրի:

- Ողջունում է Եվրոպական միության դիտորդական առաքելության տեղակայումը սահմանի երկայնքով և կոչ է անում Հայաստանի իշխանություններին, ինչպես նաև եվրոպական և միջազգային դերակատարներին բազմապատկել իրենց ջանքերը և ներդնել բոլոր միջոցները, որպեսզի պարտադրեն Ադրբեջանին հարգել կնքված զինադադարի համաձայնագիրը:

- Վերահաստատում է հակամարտության խաղաղ և վերջնական կարգավորման հասնելու ծայրահեղ անհրաժեշտությունը, որը հայ ժողովրդի անվտանգության, Հարավային Կովկասում երկարաժամկետ խաղաղության հաստատման և հայկական քաղաքակրթության բնօրրան՝ Լեռնային Ղարաբաղի ճանաչման երաշխիքը կհանդիսանա:

- Հաշվի առնելով Հայաստանի և Ֆրանսիայի Իլ-դը-Ֆրանս ռեգիոնի չափազանց սերտ բարեկամական հարաբերությունները, մասնավորապես մայրաքաղաք Երևանի հետ կնքված 2011թ. ապակենտրոնացված համագործակցության վերաբերյալ համաձայնագիրը՝ Խորհուրդը պարտավորվում է բազմապատկել ապակենտրոնացված համագործակցության ծրագրերը՝ ի նպաստ հայ ժողովրդի և նրանց իրավունքների պաշտպանության:

Ռեգիոնալ խորհրդի նիստին որպես պատվո հյուր, ներկա էր գտնվել և ելույթով հանդես եկել Ֆրանսիայում Հայաստանի դեսպան Հասմիկ Տոլմաջյանը:

Նիստի ամբողջական տեսագրությունը հասանելի է հետևյալ հղումով՝ https://www.iledefrance.fr/conseil-regional-du-9-novembre-2022

Ի Գիտություն. Ֆրանսիայի Իլ-դը-Ֆրանս ռեգիոնի խորհուրդը բաղկացած է 209 անդամներից, որոնց թվում են Ֆրանսիայի կառավարության չորս անդամներ, քաղաքապետեր, փոխքաղաքապետեր, քաղաքային խորհրդի անդամներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր